भारतको जम्मु–कश्मीरस्थित किस्तवार जिल्लामा लगातारको भारी वर्षापछि भीषण पहिरो जाँदा निर्माणाधीन ५४० मेगावाट क्षमताको क्वार जलविद्युत् आयोजनानजिक दर्जनौँ सवारीसाधन माटो, ढुंगा र लेदोमुनि पुरिएका छन्।
स्थानीय प्रशासनका अनुसार सोमबार बिहान परेको अविरल वर्षासँगै आएको पहिरो र आकस्मिक बाढीले आयोजनास्थल आसपास पार्किङमा रहेका ट्रक, डम्पर तथा अन्य सवारीसाधनलाई पुरेको हो। घटनापछि उद्धार टोली, सडक विभाग र भारी उपकरण परिचालन गरी पहिरो हटाउने तथा पुरिएका सवारीसाधन निकाल्ने काम भइरहेको छ।
पहिरोका कारण डोडा–किस्तवार राष्ट्रिय राजमार्ग (एनएच–२४४) को केही भाग पनि अवरुद्ध भएको थियो। सडकमा ठूलो मात्रामा माटो र चट्टान खसेपछि यातायात सेवा प्रभावित भएको थियो। पछि सडकको केही भाग सफा गरेर एकतर्फी रूपमा सञ्चालनमा ल्याइएको अधिकारीहरूले बताएका छन्।
प्रारम्भिक विवरणअनुसार घटनामा मानवीय क्षतिको पुष्टि भएको छैन। यद्यपि सवारीसाधन तथा आयोजनाको पूर्वाधारमा उल्लेखनीय क्षति पुगेको अनुमान गरिएको छ। प्रशासनले प्रभावित क्षेत्रमा सर्वसाधारणलाई अनावश्यक यात्रा नगर्न र मौसमको अवस्थाबारे जानकारी लिएर मात्रै यात्रा गर्न आग्रह गरेको छ।
मौसम विभागले जम्मु–कश्मीरका पहाडी जिल्लाहरूमा अझै भारी वर्षा, पहिरो र आकस्मिक बाढीको जोखिम कायम रहेकाले उच्च सतर्कता अपनाउन चेतावनी दिएको छ।
टिप्पणीहरू
टिप्पणी लेख्नुहोस्