बारा । नेपाल उद्योग वाणिज्य महासंघ (एफएनसीसीआई), मधेश प्रदेशले जीतपुर सिमरा नगर उद्योग वाणिज्य संघका पूर्व अध्यक्ष संजय साहलाई बारा–पर्सा औद्योगिक करिडोर समितिको सभापतिमा मनोनीत गरेको छ ।
महासंघको मधेश प्रदेश कार्यकारिणी समितिको २०८३ भदौ ५ गते बसेको बैठकको निर्णयअनुसार साहलाई उक्त समितिको सभापतिको जिम्मेवारी दिइएको हो । महासंघका मधेश प्रदेश अध्यक्ष विजय कुमार साहले २०८३ असोज १९ गते पत्र जारी गर्दै मनोनयनबारे जानकारी गराएका हुन् ।
बारा र पर्सा जिल्लामा फैलिएको औद्योगिक करिडोरको विकास तथा प्रवर्द्धन र त्यहाँका उद्योग–व्यवसायको हकहित संरक्षणमा साहले पुर्याएको योगदान, अनुभव र क्षमतालाई मध्यनजर गर्दै जिम्मेवारी प्रदान गरिएको महासंघले जनाएको छ ।
साहको नेतृत्वमा समितिले औद्योगिक करिडोरमा रहेका उद्योगहरूको समस्या समाधान, औद्योगिक पूर्वाधार विकास, लगानी प्रवर्द्धन तथा सम्बन्धित सरकारी निकाय र सरोकारवालासँग समन्वय गर्ने अपेक्षा महासंघले गरेको छ ।
महासंघले समितिको प्रभावकारी सञ्चालन तथा तोकिएको जिम्मेवारी निर्वाहका लागि आवश्यक सहयोग र समन्वय उपलब्ध गराउने जनाएको छ ।
बारा–पर्सा औद्योगिक करिडोर मधेश प्रदेशको प्रमुख औद्योगिक क्षेत्रमध्ये एक हो । यस क्षेत्रका उद्योगहरूको समस्या सम्बोधन, लगानीमैत्री वातावरण निर्माण र औद्योगिक विकासका विषयमा समितिको भूमिकालाई महत्त्वपूर्ण रूपमा हेरिएको छ ।
टिप्पणीहरू
टिप्पणी लेख्नुहोस्