२० माघ, काठमाडौं – सरकारले जेनजी आन्दोलनमा शहीद घोषणा भएका ४२ जनाको परिवारलाई झण्डै १२ करोड रुपैयाँ वितरण गर्ने तयारी गरेको छ। अर्थ मन्त्रालयका अनुसार ‘जेनजी शहीद परिवार कल्याणकारी समाज’ का लागि ११ करोड ९० लाख २८ हजार रुपैयाँ अनुदान रकम वितरणको प्रस्ताव प्राप्त भएको छ।
पुस २१ गतेको मन्त्रिपरिषद् बैठकले कल्याणकारी समाजमार्फत शहीद परिवारको हितमा कार्यक्रम सञ्चालन गर्न रकम उपलब्ध गराउने निर्णय गरेको थियो। सो निर्णयअनुसार सोमबार शहीद परिवारलाई वितरण गर्ने रकमसहितको कार्यक्रम खाका मन्त्रालयमा पेश भएको हो। मन्त्रालय स्रोतले बताए अनुसार, प्रारम्भमा प्रचलित कानुनअनुसार उपलब्ध गराउने निर्णय भए पनि, जेनजी परिवारले जीवन निर्वाह भत्ताजस्तो सुविधा नियमित तलब अनुसार पाउनुपर्ने माग गरेपछि मन्त्रिपरिषद्ले अनुदान रकम वितरण गर्ने निर्णय फेरि गरेको हो।
गत भदौ २३ र २४ गते भएको जेनजी आन्दोलनमा ७६ जनाको मृत्यु भएको थियो। तीमध्ये ४२ जनालाई सरकारले शहीद घोषणा गरेको छ। शहीद परिवारले १० वर्षसम्म मासिक २१ हजार ८ सय रुपैयाँ पाउनेछन्। साथै, प्रत्येक वर्ष चाडबाड भत्तासहित १३ महिनाको सुविधा उपलब्ध गराइनेछ। मन्त्रालय स्रोतका अनुसार, ४२ परिवारलाई १३ महिनासम्म मासिक २१ हजार ८ सय रुपैयाँ उपलब्ध गराउँदा कुल ११ करोड ९० लाख २८ हजार रुपैयाँको हिसाब आउनेछ।
टिप्पणीहरू
टिप्पणी लेख्नुहोस्