भारतको उत्तर प्रदेशस्थित हमीरपुर जिल्लामा निर्माणाधीन पुल भत्किँदा ६ जना कामदारको मृत्यु भएको छ । बिहीबार अबेर राति पुल निर्माणको काम चलिरहेका बेला अचानक संरचना भत्किएपछि घटनास्थलमै कामदारहरू पुरिएका थिए ।
भारतीय सञ्चारमाध्यमका अनुसार मृतकमध्ये दुई जना हमीरपुर र चार जना बान्दा जिल्लाका रहेका छन् । दुर्घटनामा भग्नावशेषमा पुरिएका थप तीन कामदारलाई उद्धार गरी उपचारका लागि अस्पताल पठाइएको छ । उनीहरूको अवस्था गम्भीर रहेको बताइएको छ ।
घटनापछि पुल निर्माणको गुणस्तर, प्राविधिक लापरवाही र सुरक्षा मापदण्डमाथि प्रश्न उठ्न थालेको छ । जिल्ला प्रशासन र लोक निर्माण विभागका अधिकारीहरूले घटनास्थल पुगेर निरीक्षण गरेका छन् भने दुर्घटनाबारे विस्तृत अनुसन्धान सुरु गरिएको जनाएको छ ।
उता, बिहीबार राति उत्तर प्रदेशका विभिन्न क्षेत्रमा तीव्र आँधी, वर्षा र चट्याङ परेको थियो । मौसम विभागले यसअघि नै खराब मौसमको चेतावनी जारी गरेको थियो । प्रारम्भिक अनुमानअनुसार खराब मौसमका कारण पुलको संरचनामा असर परेको हुन सक्ने आशंका गरिएको छ ।
टिप्पणीहरू
टिप्पणी लेख्नुहोस्