राष्ट्रपति रामचन्द्र पौडेलले संवैधानिक परिषद् सम्बन्धी अध्यादेश जारी गरेका छन् । सरकारले पुनः सिफारिस गरेपछि राष्ट्रपति पौडेलले सोमबार सो अध्यादेश जारी गरेका हुन् ।
यसअघि सरकारले सिफारिस गरेका आठ अध्यादेशमध्ये सात वटा जारी गरेका राष्ट्रपति पौडेलले संवैधानिक परिषद् सम्बन्धी अध्यादेश भने पुनर्विचारका लागि भन्दै फिर्ता पठाएका थिए । पछि सोमबार बसेको मन्त्रिपरिषद् बैठकले उक्त अध्यादेश जस्ताकोतस्तै पुनः सिफारिस गरेको थियो ।
त्यसपछि राष्ट्रपति पौडेलले सो अध्यादेश जारी गरेका हुन् ।
नयाँ अध्यादेशमा संवैधानिक परिषद्को बैठक सञ्चालन तथा निर्णय प्रक्रियासम्बन्धी व्यवस्थामा संशोधन गरिएको छ । अध्यादेशअनुसार परिषद्को बैठकमा चार जना सदस्य उपस्थित भएमा कोरम पूरा हुने र उपस्थित सदस्यहरूको बहुमतबाट निर्णय गर्न सकिने व्यवस्था गरिएको छ ।
प्रधानमन्त्री अध्यक्ष रहने संवैधानिक परिषद् छ सदस्यीय निकाय हो । परिषदमा प्रधानमन्त्री, प्रमुख प्रतिपक्ष दलका नेता, प्रधानन्यायाधीश, प्रतिनिधिसभाका सभामुख, उपसभामुख र राष्ट्रिय सभाका अध्यक्ष सदस्य रहने व्यवस्था छ ।
राष्ट्रपति रामचन्द्र पौडेलले जारी गरेको यो अध्यादेशसँगै संवैधानिक निकायका पदाधिकारी सिफारिस र नियुक्ति प्रक्रियामा नयाँ कार्यप्रणाली लागू हुने अपेक्षा गरिएको छ ।
टिप्पणीहरू
टिप्पणी लेख्नुहोस्