मधेसका ९५ प्रतिशत क्षेत्रमा पानी वितरण भइरहेको प्रधानमन्त्री ओलीको दाबी
वीरगञ्ज ।
प्रधानमन्त्री केपी शर्मा ओलीले अहिले पानीको चरम सङ्कट झेलिरहेको मधेस प्रदेशमा ९५ प्रतिशत स्थानमा पानी वितरण भइरहेको दाबी गरेका छन्।
आज प्रतिनिधिसभाको बैठकमा सांसदहरूले उठाएका प्रश्नहरूको जवाफ दिँदै प्रधानमन्त्री ओलीले सरकारले पानी संकटलाई गम्भीरतापूर्वक लिएको बताए। उनले भने, “मधेस प्रदेशमा खानेपानीको समस्या छ, तर सरकारले ९५ प्रतिशत क्षेत्रमा ट्याङ्की लगायत माध्यमबाट पानी वितरण गरिरहेको छ। बाँकी ५ प्रतिशत क्षेत्रमा पनि चाँडै पानी पुर्याइनेछ।”
प्रधानमन्त्री ओलीले दीर्घकालीन समाधानका लागि सरकारले आवश्यक योजना बनाई कार्यान्वयनको तयारी गरिरहेको जानकारी पनि दिए। “यस विषयमा सरकार गम्भीर छ,” उनले भने, “छिट्टै दीर्घकालीन रूपमा पानी व्यवस्थापन हुनेछ।”
