जीतपुरसिमरा —लाल बाबू प्रसाद कुशवाहा
रामटोल, जितपुरस्थित स्थानमा नगर स्तरीय बजेट अन्तर्गत निर्माण गरिने २६६ मिटर लम्बाइको नालाको सिलान्यास कार्यक्रम आज एक औपचारिक समारोहका बीच सम्पन्न भएको छ।
सिलान्यास कार्यक्रममा स्थानीय जनप्रतिनिधि, वडा अध्यक्ष, समाजसेवी तथा सर्वसाधारणको उल्लेखनीय उपस्थिति रहेको थियो। कार्यक्रमलाई सम्बोधन गर्दै वक्ताहरूले नालाको निर्माणपछि वरपरका बासिन्दाहरूलाई लामो समयदेखि झेल्दै आएको पानी जम्ने समस्या समाधानमा ठूलो राहत पुग्ने विश्वास व्यक्त गरे।
रामटोल क्षेत्रका बासिन्दाहरू वर्षायाममा हुने जलजमाव र त्यसबाट सिर्जने सरसफाइ समस्या तथा स्वास्थ्य जोखिमको सामना गर्दै आएका थिए। नाला निर्माण सम्पन्न भएपछि झन्डै सयौँ घरधुरी सोको प्रत्यक्ष रूपमा लाभान्वित हुने अनुमान गरिएको छ।
नगरपालिकाको पहलमा सुरु भएको यो योजना स्वच्छता, सडक सुरक्षा र जनस्वास्थ्य प्रवर्द्धनतर्फको महत्वपूर्ण कदमको रूपमा हेरिएको छ। निर्माण कार्य चाँडै सम्पन्न गरी नालालाई सञ्चालनमा ल्याउने लक्ष्य रहेको जानकारी गराइएको छ।
स्थानीयवासीले नगरपालिकाप्रति आभार व्यक्त गर्दै समयमै निर्माण कार्य सम्पन्न गर्न र गुणस्तरीय निर्माण सुनिश्चित गर्न माग गरेका छन्।
